Mga Tula Para sa Nalalapit Na Maligayang Araw Ng Mga Ama (sa Ika-21 ng Hunyo)

[arniebartley]

Parangal Sa Isang Haligi Ng Tahanan

Ang ama ang ulo ng kanyang sambahayan,
Matibay na haliging sandigan ng tahanan;
Natatanging huwaran, batbat ng karunungan,
Ang kanyang salitâ ay pinagpipitaganan -

Siya ay nagmamahal sa kanyang asawa,
Na nagpapasakop sa mga tuntunin niya;
Ang mga anak niya'y gumagalang sa kanya,
'Di siya nagkukulang ng kalinga sa kanila -

Ang ama'y masipag sa paghahanapbuhay,
Sa araw-araw siya ay laging nagsisikhay;
Mga kamanggagawâ sa kanya'y nagpupugay,
Sa kanyang kasipagan at katapatang tunay -

Higit sa lahat, siya'y may takot sa Diyos,
Sa pagmulat ng mata, sa Kanya'y dumudulog;
Taimtim ang dalangin na sa pusò niya'y taos,
Na sa Kanyang Salità ay laging nakahubog -

Bilang isang ama ay nais kong tanawin,
Ang mahal kong ama na huwaran sa akin;
Sa katuwiran, kasipagan, katalinuhang angkin,
Kabutihan, kababaan at pagka-mahabagin -

Nais kong ipagbunyi ang kanyang kagitingan,
Sa tula kong ito, siya ay maparangalan,
"Hindi ko makakamit itong aking tagumpay,
Kun'di dahil sa iyo, o mahal kong Tatay!"